هــو الانسان العقلانى مش رومانســى ؟؟
هو ايه العلاقة اصلا بين العقلانية والرومانسية ؟؟
الاسئلة دى انا فكرت فيها ولقيت انى من واجبى انى ازهقكم فى عيشتكم واسلى صيامكم واخليكم تفسرو معايا لغز الاسئلة دى بمناسبة اننا فى رمضان واحتمال ابحبح ايدى و يبقى فيه جوايز
فى الاول انا مضطرة انهار واعترف انى من الشخصيات اللى بيطلق عليها لفظ
( إنتى انسانة عقلانية )
هو انا بصراحة مش بزعل لما بيتقال انى عقلانية بالعكس انا بنشكح جدااا
لانى بحس انى انسانة بفهم الدنيا وعاقلة وبوزن الامور وعارفة انا حاطة رجلى فين ، يعنى مش ماشية فى الدنيا على رأى حليم ماسك الهوا بايديا ماسك الهوا
الغريب بقى انى بحس ان الناس هما اللى بيضايقهم وصف كلمة "عقلانى" وكأنها
شتيمة !! ودايما يربطوا صفة "العقلانية" بصفة عدم الرومانسية
"دا اللى بيخلينى اسأل هو ولامؤخذة ايه العلاقة بين " العقلانية " و "الرومانسية
الرومانسى " دا ايه مواصفاته؟؟ "
يعنى هو عنده خرم مناخير زيادة بيشم منه عبير الحب بزيادة ؟؟
واللا "العقلانى " دا لابس جوز نضارات فوق بعض علشان يشوف الحياة من
منظور اكبر واعمق ؟؟
طيب هو مينفعش بمناسبة الشهر الكريم دا نعمل كوكتيل من الخليط دا ونسميه
انسان " رومانسى متعقل " او عقلانى مترومس " ؟؟
بلاش مترومس دى علشان لو حد قالى انى مترومسة احتمال ميلحقش يرجع بيتهم
واكون كسبت ثواب فى اهله
لالا نتكلــــم جــــــد بقـــــــى
"انا شايفة ان صفة "العقلانية" لا تتعارض تماما مع "الرومانسية
يعنى مش لازم علشان اكون "رومانسية" انى اكون مسهوكة وقاعدة ليل ونهار
اسبل لكل عابر سبيل و44 ساعة فى اليوم بتكلم فى الحب وعن الحب وفائدة الحب فى اتجاه سير المجرات ؟
واللا لازم اكون بوهيمية وعايشة الحياة من غير هدف غير انى احب واقول كلام
حب واعيش قصة حب من غير ما افكر فى مستقبلى وحياتى ؟
حب واعيش قصة حب من غير ما افكر فى مستقبلى وحياتى ؟
الرومانسيـة فــى عينيــا انـا انــى اكــون
انسانة عندى مشاعر ناحية البشر واحس بيهم وبمشاعرهم ومشاكلهم
وانى اكون حد حنين وان اى حد يحتاجنى يلاقينى جنبه
انى اقدر اشارك الناس أحزانهم قبل افراحهم ، مش دى تصنف مشاعر برضه ؟؟
انا بعتبر ان اساس الرومانسية ان الانسان يكون عنده احساس مش بس تجاه اللى بيحبه لكن تجاه العالم كله
لان لو الرومانسى دا مشاعره مقتصرة على حبيبه بس ومدى ضهره لكل الناس يبقى انسان انانى فى نظرى ومعندوش احساس
!! تخيلوا بشوفه معندوش احساس رغم ان الناس بتقول عليه رومانسى
"واكيد برضه مش معنى "العقلانية
انى اكون انسانة متحجرة معنديش مشاعر ومش شايفة غير نفسى واحسب كل حاجة بالورقة والقلم والبرجل وطول النهار اقيس ارتفاع منسوب المياه فى النيل الازرق
ولكــــــــــــن
الوسطية مطلوبة فى كل حاجة بمعنى
"ان الانسان مينفعش يكون "رومانسى بس " ولا " عقلانى بس
يعنى الانسان الطبيعى بيكون عنده عقل وعنده مشاعر بس اللى بيفرق
النسبة بين الصفتين ، فلو زادت المشاعر شوية بيتقال عليه رومانسى حبتين ولو زاد الحكمة والعقل يتقال عليه عقلانى شويتين
ورغم انى زي ما قلت مش بتضايق لما حد يصنفنى انى عقلانية ودا لاسباب خاصة بشخصيتى انى اولا واثقة من نفسى جدا وعارفة انا ايه وعايزة ايه ، وايه اللى اقدر عليه وايه اللى مقدرش اعمله
يعنى من الاخر انا حد عارف حدود قدراته
وقبل كل شىء اى حد بيتعامل معايا بقوله انا كذا والله دا مناسب معاك اهلاوسهلا ولو مش مناسب مع الف سلامة وكانت فرصة سعيدة كتييييير
لكن ان الناس تصنف بعض على انه دا يععععع عقلانــي ، ودا الللللللله رومانسى انا بشوفه ضيق أُفق بَين أو هما عندهم نقص شخصى بيحاولو يعوضوه بشكل او بأخر
كــــل الكـــــلام اللــــى فـــات دا
كان مجرد فتوة صغننة من برنامج " فتـــاوى واحكـــــام " سما هانم وانا قاعدة مستنية عمو المسحراتى
رمضااااااااان كريــــم ..طم ططم طم
18 comments:
sorry 3al ra3'y,ektashaft en ana ra3'ayah
العزيزة سما
انا معاك ان العقلانيه لا تتناقض مع الرومنسيه ولكن يقول البعض ان الرومانسيه = الحلم فتتعارض مع الواقعيه والواقعيه والعقلانيه صفتين لا علاقه لكلاهما بالاخر فالعقلاني انسان يفكر ويزن الامور ومتعقل انا الواقعي الذي يخطط دائما للمستقبل و يعرف اين هو غدا اما الرومانسي فهو من يجمل الحياه ويزرع والورود و يضيئ الشموع و يلون السماء بالوان لا علاقه لها بالواقع وهو مشابه للشخص الحالم الذي يعيش بعيد عن الارض ويعلو الى ان تقع وتتكسر رقبته سعتها بس!!!! لازم هيبقى واقعي:)))
اما بالنسبه للانسان اللي بيحب حبيبه ومركز معاه لواحده وقلبه على بقيت الناس حجر فده اصلا مايعرفش يعني ايه حب وعمره ما يستقر في اي قصه لفتره طويله لانه انسان اناني واللي بيحب بيضحي في اي شيئ اما اللي بيوزنها بقلبه بس فده بيقوله عليه عاطفي وليس رومنسي وده طبعا اخر حاجه بيعملها انه يستخدم عقله وبيكون مصيره مستشفى الامراض العقليه بيعمله لمخه عمره كهربا وغالبا 99% مابيتصلحش وبيرح فتيس
ياريت يكون رائي واضح وملخبطكيش
تحياتي
انا لما لقيتك كاتبه بوست جديد قلت كويس ادخل بقى وارغى شويتين كالعادة معاكى بس بعد ما قريت البوست لقيت معنديش حاجة اقولها لانى بتفق مع كل اللى قلتيه
طب ينفع اعلق واتكلم عن اسعار الفاكهة؟
سيمو
اولا مبروك العودة للتدوين وسلسلة المدونات المتتالية اللى انفتحت دى من حسن حظنا طبعا بس عايز اعرف باقى الفروع حتتفتح فين بهزر طبعا
الموضوع بتاع علاقنية ولا رومنسية انا بتفق مع كلامك في انى الوسطية مطلوبة لانى بمنتهى البساطه فى مواقف من الحياة بتتطلب تحكيم العقل وكمان فى مواقف بتتطلب الرومانسية ويكون اختيار التعامل عقلانى او رومانسى حسب ما يميله الموقف على الانسان
كل سنة وانتى طيبه ورمضان كريم عليكى وعلى ناردين
انا جيت عندك أشوف أخبار الطقس ايه
لقيت الوضع مش مستقر أوى برضه
:)
عقلانى .. رومانسى
هو أنا بتفق معاكى
و أحب أضيف
ان الموضوع بيكون نسبى من شخصية لشخصية
ترجع لطبع الانسان و المناخ اللى اتربى فيه
بترجع كمان للتوقيت
مينفعش كل الأوقات نكون عقلانيين و كل الأوقات رومانسيين
و أهم شئ طبعاً ان دايماً يكون فيه مشاعر الحب و الاهتمام
تحياتى
سما باشا
اينعم يافندم انتي عقلانية فعلا
بس على فكرة الانسان العقلاني مالوش اي علاقة بان يتقال عليه انسان مش رومانسي
احنا بس اللى بنتصرف غلط
يعني بقول انا انسانة عقلانية فلما الاقي حد يكلمني فى الحب والتضحية والحاجات دي
ابصله من فوق لتحت واقول مجنون ده ولاايه لا طبعا واضحي ليه وحتى لو حضحي
يبقى اوك ده لو ضحيت ايه المقابل
دي بقى مااسمهاش عقلانية ده اسمه انسان معندوش مشاعر انسان معندوش قلب
اصلا مش عقلاني وبس
لكن فى ناس عقلانية جدا ورمانسية جدا برضه
يعني بتدي لكل حاجة حقها ناس طموحة اوي ومنظمة جدا وممتازة فى شغلها
وفى نفس الوقت فى الحب وعلاقتها بالحبيب بتبقى رومانسية وجميلة جدا
عارفة بالظبط زي مسلسل "ذا ال ورد"
بيت بتبقى جامدة في شغلها وواخدها جد اوي
لكن لما بتبقى مع حبيبتها تينا بتبقى قمة فى الرومانسية لدرجة اني بعد 5 مواسم
انا مش شايفة ان فى حد عارف يحب زيها اجمل واحدة عارفة تعبر عن مشاعرها
احممممم شكلي سرحت فى المسلسل وبيت شوية معلش بقى اصلي لما بشوفها
بنسى نفسي هههههههههههههههه
ياسما مش الانسان الرومانسي هو اللى عنده مشاعر ناحية البشر ويحس بيهم
لألألألأ المفروض ان كل البشر يحسوا بكدة ويبقى جواهم مشاعر لانهم بني ادمين
ده حتى الحيوانات عندهم مشاعر برضه
اللى مش بيحس ده معندوش قلب اصلا
الانسان الطبيعي هو اللى بيعمل كل اللى بتعرفيه بانه انسان رومانسي
ده المفروض الانسان الطبيعي
اللى مفهوش كدة يبقى مش عقلاني لا ده يبقى انسان مش طبيعي
انتي عارفة احنا بنقول على الرومانسي
اللى هو طول الوقت بيفضل كدة متنح وماسك وردة ومشاعره مدلدقة منه
احنا اللى بنقول كدة احنا اللى غلط
لكن ده مش تعريف الانسان الرومانسي
هو انا راي ان الانسان الرومانسي والعقلاني الفرق بينهم الاتي
الرومانسي : يشوف موقف حزين فى الافلام يتأثر بسرعة
العقلاني : لأا طبعا مايتأثرش ويقول ده مجرد تمثيل
الرومانسي : ممكن يشوف منظر فى الشارع صعب زي مثلا واحد خبطته عربية
الرومانسي ممكن يغمى عليه ومايستحملش
العقلاني يفكر يطلب الاسعاف او يساعد المصاب ده
يعني الرومانسي بيحكم مشاعره وقلبه الاول
العقلاني بيحكم عقله الاول
بس الاتنين متساويين يعني الرومانسي عنده عقل بس بيجي بعد قلبه
يعني بيعرف يفكر بعقله لو لزم الامر
والعقلاني عنده مشاعر وبيعرف يظهره برضه لو لزم الامر
مش عارفة بعد الرغي ده كله قدرت اوضح وجهة نظري ولاايه ؟؟
انا حاسة انك بعد ماتقري حتقولي
نعم؟؟؟ او ها ؟؟؟ههههههههههههههههههههه
يالهوي ده انا شكلي كتبت بوست مش تعليق معلش بقى يالا استحمليني
بس على فكرة انا مش رغاية اوعي تقولي عليا رغاية ههههههههههههههه
سما الجميلة
على فكرة.. كلمةرومانسى اول مايتطرق الى الذهن هو الانسان العاطفى .. بينما فى التعريف هو الانسان الخيالى .. المغامر .. البطولى
ولما كان المحبون يحبون العيش فى دنيا الملائكة والمثالية فقد التصقت بهم هذه الصفة
وزى ماقلتى .. كل انسان هو مزيج رائع بين الاثنين .. قد تزيد كفة عن كفة
أخيرا ياسيدتى .. كيف يقول عنك الناس انك عقلانية وانت قمة فى الرومانسية
عايزة الدليل؟ انظر البوست السابق
تحياتى
هاى
مش عارفة اقول حاجة
نفسى اقول ان رايى كذا وكذا ههههههه
بس المشكلة ان كلامك كله صح ومتفقة معكى فيه
على فكرة المدونة روحها حلوة:)
تحسى كدا هواها بحرى ههههههه
تحياتى
مثلية تبحث عن ذاتها
انتى عارفة رأيك فكرنى بجملة هو البيضة الاول واللا الفرخة
يعنى انا لما ركزت فى رأيك لقيت ان تفسيرك للانسان الواقعى والعقلانى هو نفس التصنيف بس بكلمات مختلفة
والنتيجة ان الاتنين واقفين على ارض الواقع وعارفين هما رايحين فين
وكذلك الرومانسى والعاطفى الاتنين بيوزنو الامور بقلبهم اللى غالبا هيجيب اجلهم ويبعتهم على اللالا لاند
يبقى ايه لزومها اللفة الكبيرة اللى توهتينى فيها دى طالما طلعنا بنفس النتيجة
انتو غاويين تتعبونى واللا ايه ؟؟ هو التركيز دا مش بفلوس ؟
بس لو انتى مقتنعة ان العقلانى غير الواقعى فانا احترم رأيك جداااااا
بس الاول ابقى فهمينى هى البيضة الاول واللا الفرخة ؟
: ))
تحياتى يا فندم ومنورة
العزيزة بلاك كايرو روز
والله انا اتبسطت اننا متفقين فى الرأى بس برضه هزعل لانى بحب ارغى وانم معاكى حتى لو مختلفين
عموما انا هفكر فى بوست ننم فيه براحتنا
وانتى طبعا اتكلمى عن اسعار الفاكهة براحتك واعتبرى ان سوق العبور قصدى البلوج بتاعى كله بتاعك : ))
منورانى دايما يا قمر
العزيز رئيس جمهورية نفسه
ايه يا باشا هو انا لازم اجيب لك ضبط واحضار واللا ايه ؟؟
مش عيب برضه متمضيش التمام هنا من بدرى ؟؟ عموما اللى على على ياباشا ربنا يجعلنا من بركاتك : ))
كل سنة وانتى طيب يا قمر وميرسى على امنياتك الرقيقة
والحمد لله انك متفق معايا فى الرأى يا عم انا مش قدك :)
منورنى يا جميل وخلينا نشوفك دايما
هابى هووب
لا والله دا الجو طلع معتدل اهو ومفيهوش زعابيب بس احتياطى المرة الجاية هاتى معاكى شمسية محدش ضامن الظروف : ))
والله انتى صح وزى ما قلت ان الوسطية مطلوبة ولكل مقام مقال يعنى مينفعش حد يعيش حياته كلها على نهج واحد والا تبقى الحياة مملة
خالص الود لكى ولحبيبتك
كلام من القلب باشا
طبعا انتى عارفة ان بوقى من الودن للودن من قبل ما اكتب ردى عليكى
لاننا اتكلمنا فى الرد قبل كده
فانا فعلا فعلا مش عارفة اقولك ايه حاجة غير القول المأثور بتاع احمد زكى
ابوك هيسيب البيت يا معلم سلطان
البيت هيتطربق على دماغنا ودماغ اللى خليفونا يا ابو السلاطين
وحبة فوق هييييييييييييه وحبة تحت هيييييييييييه
بتقول ايييييييييييييييييييييه
بجد توهتى اهلى
قريت التعليق 3 مرات ومش فاهمة منك انتى بتتكلمى على ايه مش معقول كده مش بفهم منك حاجة لا نت ولا تعليقات ولا واقع وطول النهار بصالى على البلكونات
ماهو انتى لو بتركزى فى الكلام كنا فهمنا وحلينا المشكلة وعرفت ارد عليكى بدل الحوسة دى
ارجع واسألك تانى
هل انتى من المؤيدين لى ولحكمى ام انك والعياذ بالله من المعارضين ؟؟
تكلم يا ابن الشششششعب
واعلم .. اعلم انك فى قلبى : )))
بس اهم حاجة فهمتها من كل دا ان بيت وتينا بخير ولسة بيحبوا بعض الحمد لله : ))))
منورة يا قمر ومستنية الترجمة بس متتأخريش بدل ما اقولك ثوانى انتى حرة : )))
العزيز شريف
والله يا شريف انت اخجلت تواضعى بكلامك الرقيق دا بس انا عايزة اصدمك واقولك ان كلام البوست اللى فات مش كلامى
دى كلمات الرائعة غادة السمان وانا اخترت اجزاء انا حساها مش اكتر
انا ممكن اكون انسانة عقلانية بس عاطفية يعنى نقدر نقول انى المزيج ما بين الواقع والخيال اذا صدق التعبير
ساعات احب رجلى تكون لامسة الارض وحاسبة حساب كل حاجة
وساعات افرد جناحاتى واطير بعيد عن الناس والواقع والدوشة
يعنى انا بين البينين
تفتكر هعيش يا دكتور ؟؟
: ))
منورنى يا صاحب ارق وردة فى بلوج سبوت كله
Princess
اهلا اهلا بيكى
والله انا كلامك اسعدنى واخجلتى تواضعى : ))
وجميل ان مدونتى هواها بحرى بس اوعى تاخدى برد ويبقى ذنبك فى رقابتى : ))
منورة واتمنى اكتب موضوع تردى عليه يا ستى براحتك
خالص التحية
يووووووووووووووه بقى هو انا فاضية للكلام ده هو انا اكتب واعلق وافسر برضه
لا والله ده كتير والله هههههههههه
طيب استني بقى اروح واقرى اناالتعليق يجي 3 او 4 مرات كدة يمكن افهم واجي افهمك
ياستي انا بقول ان مفيش فرق بين الانسان العقلاني والرومانسي
الاتنين عندهم مشاعر وعندهم عقل بس كل واحد فيهم بيستخدم مشاعره او قلبه وقت اللزوم
يعني العقلاني عقله الاول وبعد كدة مشاعره بتظهر وقت اللزوم بس مشاعره لما بتظهر بتبقى جميلة اوي
والرومانسي بيحكم مشاعره الاول بس وقت اللزوم بيعرف يحكم عقله وبرضه بيعرف يحكم عقله كويس اوي
يعني احنا اللى غلط وتعرفتينا بالعقلاني انه معندوش مشاعر وان معندوش قلب
والرومانسي هو اللى بيدلدق فى مشاعر وبيفضل متنح والوردة فى ايديه لغاية ماتدبل
التفسيرات بتاعتنا دي هيا اللى غلط ومش حقيقة
بقولك ايه بقى ياسما انا معنديش اي استعداد افهمك تاني مش عايزة اقولك انا تعبت لغاية ماانا افهم وافهمك قد ايه ههههههه
لا بجد اتمنى المرة دي تكوني فهمتي وجهة نظري ياجميل
ها فهمتي ولا ؟؟
كلام من القلب
هاا؟؟؟
ههههههههههههههههههه
لا لا لا المرة دى فهمت الحمد لله انقذنا مش يمكن انقاذه
شفتى يا شيخة لما بتركزى الحياة بتبقى سهلة ازاى
يبقى كده انتى موافقانى ان العقلانية لا تتعارض تماماالرومانسية زي ما انا قلت
يا شيخة كنتى قلتى انك من المؤيدين لي ولحكومتى ووفرتى علينااللفة دى : )))
عاملة زي عادل امام انا عايزة اضيف
هى فوق انها رقاصة هى الحقيقة كانت بترقص :)))
منورة دايما يا جميل
Post a Comment