MyAll

I am thinking of you

In my sleepless solitude tonight

If it's wrong to love you

Then my heart just won't let me be right

مجرد أفكار متناثرة

الشـــــــــك

يقولون اننى أشك بأصابع يدي
وكيـــــف لا ؟
وكل من آمنتهم خذلوني كلا على طريقته ..

شابوه للكذب

الخــــــــداع

أقنعة براقة لا يستخدمها إلا البشر
فأى لون من الاقنعة سأواجه قريبا ؟



الخيانــــــــة

لا اعتقد انها ستقدم ماتش إعتزال .. فالبشر سيظلوا بشر



الحــــــــب

كرقصة التانجو تحتاج دائما الى راقصين
يشعران بالخطوة .. ولا يستعرضوها ..

الكبريــــــاء

سلاح ذو حدين لا استطيع التخلي عن إحدهما



السعـــــــادة

حلم جميل نحققه في دنيا الاوهام..فقط



اللـــــــــــــه

الحقيقة الوحيدة بلا أقنعة ولا زيف
لانها لا تحمل من صفات البشر شىء



جملة أكرهها

!! لا اريــد ان أخســـرك
فمـــاذا فعلـــت لتبقينـــى ؟؟



أنـــــــــــــا

عندما أستسلم للحزن أو اليأس .. لن اكون انا
..وانا.. انا مش أى حد تانى

شابوه للتفائل

بوووم .. تيييش .. آآآى

من حقنا اننا نحب .. ومن حقنا نحلم نقضى اللى باقى من عمرنا مع اللى بنحبه

بس قبل ما نحلم اننا نعيش معاه

وقبل ما نبنى قصور احلام وسعادة على الرمل

لازم نبقى متأكدين من مشاعر الطرف التانى

يعنى بيبادلنا نفس الحب ؟ واللا هو فى عالم تانى ؟



طيب لو حبيبك دا مصرحش بمشاعره .. و ملمحش .. ومأخدش خطوة

هتعملى اييييييه ؟

هتاخدى خطوة وتتكلمي انتي ؟؟


يا فضيحتشى ... لأ انا استنى لما يجي يتكلم هو واللا ان شا الله عنه ما جه

أدينى قاعدة هو انا ورايا ايه يعنى ؟ اهو لو جه من نفسه يبقى كويس انما لو مجاش بققققققققققى





هستنـــاه برضـــه مـــن سنـــــة لعشـــــرة




الكلام دا طبعا مش تريقة

بس دا حال البنات دايما خصوصا الشرقيات .. الدنيا تتشال وتتحط حواليهم وهما قاعدين مستنيين الفرج


حتــــى فــــــى الحــــــب


تبقى البنت متشحتفة وبتفرفر بس قاعدة حاطة رجليها فى ماية ساقعة ومستنية الراجل هو اللى يجى يتكلم


طبعا دا كلام جميل جدا وخصوصا ان من شيمات الانثى الخجل والكرامة والعزة وانها تحس ان الراجل سف التراب علشان بس تحن عليه وترميله رمش


لكن ازى الحال لو اللى بتحبيه دا والعياذ بالله صنننننم بججججم على رأى عبد السلام النابلسى ؟


إفرضى انتى أصلا مش فى دماغه ؟ يبقى هتعرفى ازاى الا اذا اخدتي خطوة ؟
واللا برضه هتقعدى تستنى الفرج ؟



وعلشان كلامى يبقى مدعم بالمستندات فانا دلوقتى هحكيلكم حكايتين باختصار شديد حصلو فعلا فى الواقع


ومن الواقع والى الواقع نعود ... وحدووووووه


الحكاية الاولى : كانت لواحدة صاحبتى اوى كانت بتحب واحد قريبها كان دايما عندهم فى البيت لاسباب عائلية ، وهى كانت واقعة فى غرامه لدرجة انها عاشت حلم انها اتجوزته وشكل بيتهم واولادهم قبل ما يفتح بوقه علشان يتتاوب حتى

وكانت هى 24 ساعة تحكيلى عليه وانا كل مرة اقول لها يا بنتى بطلى واهمدى ومتعيشيش فى الوهم لغاية ما تتأكدى من مشاعره أو حاولى انتى تجسى النبض وتجرجريه للخطيئة وتخليه هو اللى يتكلم احتمال ربنا يكرمك وتخليه يغلط غلطة عمره ويتجوزك وهو يبقى كفر عن كل ذنوبه فى الدنيا

ورغــــم ان نصايحـــــى تــــــودى اللومـــــان اقصـــــد مفيـــــدة وهايلــــــة

بس كانت هى من نوعية يا فضيحتشى لاااااااا مقدرش بس هو أكيد بيحبنى .. هو بيجى عندنا فى البيت كتير كل شوية هيكون ليه يعنى ؟

ورفضت مع الاسف مع الالم انها توقعه فى الخطيئة ..وكل شعااااع سحرى فى اقناعها مجبش نتيجة

فقلــــت بقــــى أشحــــن البطاريـــــات

فأتنهدت وقلت لها والله انتى ما هتفوقى الا ما يجى فى يوم من الايام يعزمك على فرحه

ويارتنى ما قلت .. تقولوش باب السما كان موارب

بعدها بحوالى عشر ايام جه عزمها على خطوبته .. وكانت الطامة الكبرى

شفتوا اللى مش بيسمع كلامى بيحصله ايه ؟؟


بس انا برضه كنت بلومها هى اكتر منه لان كل التصرفات اللى كانت بتقول انه بيعملها كانت عادية انها تتاخد بتفسير طبيعى بين القرايب .. لكن علشان هى بتحبه كانت بتفسر كل موقف وحركة باللى هى عايزة تصدقه وبتحلم بيه



ندخــل برجلينــــا اليميــــن علــــــــى

الحكاية التانية : ودى كانت لسما هانم اللى كرامتها على طرطوفة مناخيرها .. مش انا مش انا


كان ياما كان يجى من عشرميت سنة كده كنت اتعرفت على واحد صاحب واحد صاحبى وانا اولى جامعة او تانية مش فاكرة، ومن اول يوم حسيت انه مهتم بيا بشكل مختلف عن اهتمامه بأى واحدة تانية

وانا كان عاجبنى أخلاقه وعقليته لانه كان شخصية محترمة وطبعا دا كان نادر ومازال نادر سواء فى البنات او الولاد دلوقتى

بس هل كنت بحبه واللا لأ دا مكنتش متأكدة منه ,، لكن الاكيد انه كان عاجبنى غموضه وهدوءه

المهم اخينا دا كان كل تصرفاته فاضحاه بس مش بينطق وانا بالى مش طويل اوى يعنى

بالاضافة انى بكره الامور العايمة بحب اعرف نهاية الشىء سواء بالسلب او بالايجاب علشان اما تكون بداية او نهاية لكن المط والتطويل واحلام اليقظة دى مبحبهاش

الاخ دا بقى كان بيتكسف من خياله وخصوصا معايا فكان مفيش فيه أمل يعنى لو قعدت عشر سنين مش هينطق رغم انى كنت واثقة مليون فى المية انه بيحبنى


فقلت فى سرى وبعدييييييييييين بقى ؟؟؟ طييييييييييب


و فى مرة شمرت كومى وقلت مبدهاش .. استعاننا على الشقى بالله

كان بيكلمى فى التليفون وبيحكى فى موضوع ففى وسط الكلام قلت له قولى يا ...... انت بتحبنى ؟؟

..هو تقريبا كان نفسه يقفل الخط بس ربنا موفقهوش

فقالى بصوت طالع من غيبوبة .. آيووة

قلت له امال مش بتنطق ليه ؟؟

قالى علشان مش ضامن رد فعلك

قلت له طيب بمناسبة رد فعلى تصبح على خير انا هنام وقفلت


بس بعدها لما بدأنا نتكلم اكتر حسيت اني مش بحبه وانى برغم اعجابى بشخصيته وانه فعلا ممتاز الا انى محسيتش ان هو دا اللى عايزة اكمل عمرى معاه

طبعا الحكايتين عكس بعض واللى عايزة اوصله منهم

هل لو حسيتي بمشاعر تجاه حد تستنى الفرج وان اللى قدامك يحس على دمه ويتحرك واللا تاخدى خطوة وتروحى

تسألى اللى بتحبيه اذا كان بيحبك واللا لأ ؟؟

بس احتمال أوى ان الاجابة تكون لأ

وساعتها هيبقى الوضع

بووووم تيييييش آآآآآآآآآى علـــــى الاخـــــــر


لكن دا فى نظرى برضه هيكون احسن كتيييير من انك تفضلى متشعلقة فى حلم وبعدين تفوقى على كابوس ودش ماية ساقع


هاااا ؟؟ هتاخدى نفس وتغطسى قصدى تتكلمى انتى ؟ واللا تستنى لما يجى يعزمك فى يوم من الايام على فرحه ؟


انا بقول تستنوا الفرح علشان تعزمونى واجى أمسك انا الشمعة للعروسة وافتتح البوفيه

سأبدأ من أول السطر

.. سأبدأ من أول الخصر
إن كنتِ تعتقدينْ
بأني تلعثمتُ مثل التلاميذ ..فوق السريرْ

.. سأبدأ من قمة الصدر
إن كنتِ تعتقدينْ
بأني تصرفتُ كالأغبياءْ
أمام دموع المرايا .. وشكوى الحريرْ

..سأبدأ من شفتيكِ نزولاً
إذا كنتِ تخشينَ من غربة الليل والزمهريرْ

.. سأبدأ من قدميكِ صعوداً
.. إذا كان لابد لي أن أموتَ

لأربـــــح هــــذا الرهـــانَ الكبيــــرْ

نــــزار قبانــــــى

القُبلــــــــــــــــة

القُبلة القُبلة القُبلة

القبلة ان كانت للملهـوف
اللى على ورد الخد يلوف
ياخدها بدال الواحدة ألوف

ولا يسمــع للنـــاس كــلام
ولا يخشــى مــن النـــاس مــــلام

بمناسبة ان رمضان خلص بقى فأسمحولى أنحرف واتكلم فى موضوع أياااه كيسكيلياه


ألا وهو القُبلة او البوسة

أوعوا حد يفهمنى غلط والله انا مُحرجة وانا بتكلم فى الموضوع دا بس انتو عارفين لما فكرة بتسخن فى دماغى بحط على وشى مَنخُل وادخل أتكلم على طوووول ولا يهمنى حاجة وعلى رأى عادل إمام لا حياء فى العلم لا حياء فى الدين لا حياء مع رجال البوليس


فيه ناس منكم هيقولو عليا عبيطة علشان ناس كتير شايفين ان القُبلة دى مجرد فاتح شهية او بداية طبيعية للى هايجى بعدها يعنى شىء لابد منه علشان الخطوة اللى بعدها

فيه مثل انجليزى بيقول

No fucking without kissing


لكن انا طول عمرى بشوف ان القبلة دى شىء كده مستقل بذاته ملوش علاقة بأى حاجة قبله ولا بعده ومش لازم بالنسبة لى انه يكون فيه أى حاجة بعده

يعنى مش لازم علشان ابوس حد نروح بعد كده نعمل علاقة جسدية

لكن انا ممكن ابوس اللى قدامى من غير مناسبة .. يعنى أحس انى عايزة ابوسه فأعاقبه وابوسه

بعتبر ان القُبلة تعبير عن احساسى فى الوقت دا سواء حب أو سعادة او إمتنان او بقوله انى بحبه بس من غير ما اقولها بالكلام

***

زماااان زماااان وانا زئردة فى المدرسة أعتقد فى ثانوى كنت قريت كتاب مترجم هو كان طبى وبرضه بيتكلم عن المشاكل الجنسية بس كان كتاب محترم مش من الكتب اياها

اللى علق فى دماغى من الكتاب كله كان فصل بيتكلم فيه عن القُبلة


والحتة اللى ركزت فيها أوى أوى كانت بتقول فيما معناه

إنك لو على علاقة بحد وحصلت بينكم قُبلة وحسيت إنك مش طاير من السعادة وان بوسته دى مخليتكش تنسى كل الدنيا ومتفتكرش غير فى طعم شفايفه

او انك تبقى مش مرتاح لنَفَسه وانت قريب منه ، ودا مش معناه انه مش بيغسل سنانه بالفرشاة قبل ما يبوسك لكن يقصد ان فيه نَفَس تحس انك بتحبه وعايز تفضل لازق فى وش اللى قدامك وعايز تتنفس حتى النَفَس اللى بيطلعه

وتلاقى روحك تلقائى بتقوله انا بحب نَفَسك أوى


وفيه حد تانى يبقى نَفَسه نضيف برضه بس انت مش بتحبه ومش عايز تقرب منه


لكن لو حد مقرف بقى يبقى تاخده من قفاه على الحمام وتقوله زي عبلة كامل فى فيلم سيداتى آنساتى إستحمى واغسل سنانك بالفرشاة كويس ولما يجى يبوسك إبقى اقعد شمشم فيه أو إلبس كمامة أضمن


على فكرة انا شخصيا بنى أدمة بقرف اوى اوى اوى وخصوصا فى موضوع النضافة الشخصية على رأى اصحابى بكيزة هانم

المهم علشان متتوهوش منى

الأخ المؤلف بقى قال لو اللى انت معاه محسيتش ناحيته بالاحاسيس اللى انا قلتها فوق دى

أوعى أوعى ترتبط بيه لانه هيكون إرتباط فاشل

ناس منكم هيقولو ايه الراجل الهايف دا ؟؟ يعنى هو ساب كل المشاكل اللى بين الناس ومسك فى البوسة ؟

بس لو ركزنا وفكرنا هنلاقى ان للقُبلة فى حد ذاتها لغة خاصة

لغة حوار ميفهماش غير أصحابها وبس

فاما تطلعهم السما او تدفنهم فى الارض


هو الحقيقة مش القبلُة بس اللى هتبوظ العلاقة بين طرفين ولا العلاقة الجنسية نفسها لكن هى شوية حاجات كده جنب بعضها إحتمال اتكلم فيهما بعدين

بس خلونا دلوقتى نركز فى القُبلة اللى هى موضوع البوست


انتو بقى القُبلة بتمثل لكم ايه ؟؟ وايه معناها فى حياتكم ؟

انا عايزة انهيار واعتراف كامل بالحقيقة وكل واحد يجيب معاه اتنين شهود مرتبهم ميقلش عن 86 جنيه