ينهض من بين رُفات أخر ضحاياه
ينفض عن جسده بقايا أشلاء أصرت على التشبث به حتى النهاية
ويذهب ليغسل أثار أخر قطرة دماء أحبته بصدق
::
ويستعد ليبدأ ليلته الدموية
ليلة فيها يمتص الارواح
ليبعث الحياة فى قلبه الميت من جديد
::
يتلون لسانه بأثمن الأصباغ
ويستبدل حدقتى الشيطان بنظرة ملائكية هائمة
ويأتى بقيثارته ليعزف لحنه المحرم
على أوتار القلوب الوحيدة
فيلقى عليهن تعاويذه المسمومة بصوت كفحيح الأفعى
::
تعالوا إلى ايتها الطامعات بالهوى
الحالمات بالعشق الأبدى
فمعى أنشودة السحر ، من تسمعنى
يجرى حُبى مجرى دمائها ، وتنال الخلود
::
ويبدأ بالرقص على أصوات آهاتهم المحمومة
وتتساقط عليه كل من تريد ان تمسسها تعويذة الحب والبقاء
يذهبن بلا عقل ولا إرادة ، ولكن بمنتهى الارادة
وعندما يزيد العدد بقلبه
.. يتزمـــــــــــر
دعونى آتى بدفترى وأدون الاسماء فأنتن فوق حاجتى الآن
، وتلمع أنياب غدره من جديد
::
.. يستعــد للرحيـــــل
وهو يردد تعويذته المُحرمة
المجد لشيطان العشق وسُحقا لعبيده
25 comments:
ازيك يا سما
انا قلت انا دخلت فيلم رعب و بتفرج على دراكولا
انتى قلتى هتنكدى علينا بس ده مش نكد
ده أكشن و دم و شياطين و كمان ختمتيها بالتعويذة !!
أعوذ بالله
:))
بس بصراحة قوي جداً
بوست يشيب له الولدان
:))
طريقة تشبيهك و ربطك بين الأشخاص اللى بيستغلوا أى قلب يبحث عن حب عشان يكون مصدر قوة و تسلية ليهم
ده مش بيكون امتصاص دم بس .. ده بيكون كمان امتصاص روح و طعن قلب
بحييكى
أهلا اهلا يا بيبو ازيك
هو انتى مش واخدة بالك ان دا فيلم Meeting with a vampire ؟
بس للاسف برادبيت مقبلش الدور فجبت الاخ اللى لابس جيب دا :))
بس انا قلقانة حد يعدى فى البلوج يشد له الجيب رُكبه تبان ويكون حد من الحريم خالع راسه تبقى فضيحة .. يالا ربنا يستر على ولايانا :))
ايه دا هو انا قلت انى هنكد عليكم بس و مش هرعبكم ؟؟ اممممممم طيب خلاص وعد ليكى عندى بوست نكد علشان تحرمى تعترضى او تتريقى تانى :))
منورانى دايما يا جميل
سما
بتمنى ليكى كل خير وسعادة وصدقينى بقول كده من قلبى
معرفش ايه علاقة الاحساس ده بالبوست الدراكولى، بس ده اللى عايزه اكتبه
وعلى فكرة اسلوبك حلو قوى فى نوعية الكتابات دى
الله يا سما
بجد مش قدره اقولك انا استمتعت بها قد ايه و تخيلت كل كلمه فيها ازاي مش معقول بجد انتي اكتشاف امال ليه مبتكتبيلناش كده من زمان مش عارفه اعبر بكلام معقول دي فكرتك وكلماتك دانتي مبدعه يابنتي طب ما تحترفي بجد مش كفايه انها تكون مجرد قصه على بلوج يقراها عدد محدود تسمحيلي اوزعهالك في انحاء المعموره؟ بس اوعي تكبسيني و تردي رد من اياهم و تقوليلي بعدها اشربي العصير ههههههه
تحياتي لقلمك الساحر
اه رجعت عشان اقولك اني مكونتش سمعت الاغنيه وطبعا لما سمعتها كان لازم اعلق لأنها فوق الوصف من الجمال كلمات خطيره بجد بس عايزة اتأكد هو اللي بيغنى بهاء سلطان ولا مين و ايه بالظبط اسم الاغنيه
انا مستغرباكي مش عارفه ليه مش انتي اللي دايما بتكتبي حسه انك في مود غريب عن كتابتك بقالك وقت يارب تكون تهيوءات ويارب تكوني دايما في احسن حال و بخير
أجمل روز
ياقمر ربنا يخليلى قلبك الجميل وذوقك ، وبجد انا واثقة يا روز ان الكلام دا من قلبك لانك شخصية صريحة ومش بتعرفى تجاملى ولما هتقولى حاجة اما هتقوليها من قلبك او مش هتقوليها خالص
وحتى لو كلامك ملوش علاقة بالبوست فكفاية ان الاحساس واصلنى وفاهمة تقصدى بيه ايه فيبقى فى محله برضه ، واكيد من القلب للقلب لان انتى كمان انسانة رقيقة وتستاهلى كل خير وفرح
وبخصوص رأيك فى البوست فطبيعى لما انسانة عبقرية فى الكتابة زيك تقول ان اسلوبى حلو يبقى لازم ابروز رأيك دا وانشره فى الاهرام بكرة الصبح ، وأقفل البلوج بقى علشان اعتزل وانا فى القمة :))
مساء الفل يا قمرة
العزيزة مثلية تبحث عن ذاتها
تصدقى انا قعدت اقرى ردك وانا رافعة حواجبى كأنك بتتكلمى على اللى جنبى مثلا :)) ، يا جميل رحم الله إمرءٍ عرف قدر نفسه .. اكتشاف واحتراف وإبداع ايه بس يا فندم ؟ دى كده جت مع الهُبل دُبل ههههههه يعنى مجرد احاسيس لفكرة فى دماغى حبيت اعبر عنها بطريقة مختلفة عن اللى متعودين عليه معايا
توزعى ايه بس يا راجل ؟ استرى عليا الله يسترك انتى عايزة تفضحينى واللا اييييييييه ؟ :))
..................
لأ العصير انتى عارفة بشربهولك عند روز بس :)) لكن مش عارفة ليه حسيت انه معجبكيش !!! طب اجيب لك شاى طاااه؟؟؟ ماهو انت لاااااازم تشششرب :))
أوعى تكونى زعلتى بجد ؟ انا عارفة انك طيبة اوى وانك كنتى بتهرجى وكله كان بحسن نية بس اكيد فيه شوية حثالة وغوغاء معندهمش نفس حسن النية ، فأكيد انا محبش شوية ............ يقعدوا على المصطبة ويعملوا من موضوع بسيط وعادى قصة وحدوتة دول عالم فاضية انتى عارفة :))
بالنسبة للغنوة يا جميل اسمها وتندم ليه كلمات هانى عبد الكريم والحان حبيب قلبى وليد سعد وطبعا هو صح بهاء سلطان هو اللى بيغنيها
.....................
جملة مش عارفة ليه مش انتى اللى دايما بتكتبى فكرتنى بجملة محمد صبحى مش عارفة ليه حاسة ان بعضى مش زي بعضى ( زي بعضه ) .. :))
لأ انا قردة هى تهيآت تهيآت بس يمكن مع بدايات الشتاء زي ما قلت قبل كده بتجيلى حالة اكتئاب خفيفة وبتروح وهرجع لمراجيح السبتية تانى قريب لا تقلقى :)
منورانى يا سكرة وميرسى على رقة احساسك وذوقك
Sola
انا سيبت الرد عليكى للاخر علشان حسيت انك مهرتلة فقلت اخليكى للاخر علشان ارد عليكى بمزاج
اعتقد ان البلوجات بتاعتنا انا وناردين مش بلوجات دينية ومش دعاية لاى دين من اى نوع سواء اسلامى او يهودى او مسيحى ولكن هى بلوجات شخصية بحتة زي ما انتى ليكى بلوج شخصى بتكتبى فيه اللى انتى عايزاه بطريقتك ورأيك الخاص مش علشان الناس تسقف لك وتقولك الله ولا حاجة
فاحنا برضه فاتحين بلوجاتنا الشخصية علشان نكتب فيها اللى احنا عايزينه حتى لو مش عاجب اى حد لان احنا عاملينها لمتعتنا الشخصية مش لمتعة الناس ، و رأى اى حد من هيزود من قدرنا ولا هينقص من قيمتنا لان قيمتنا احنا اكيد عارفينها كويس جداااااااا بعيد عن رأى اى حد ايا كان مين
وطالما هى بلوجات شخصية يبقى اللى مش عاجبه الكلام ميدخلش عندنا لان عدم وجوده مش هيفرق معانا اكيد
...................
اما بخصوص تعليقك التانى انك بتضايقى لما حد مسلم يتنصر فدا مش مشكلتى دى مشكلتك وحلها مش عندى ولا عند ناردين فى البلوج لاننا فى الحقيقة مش فاتحين بلوجات مقارنة اديان
ولو انتى غيورة على دينك وشايفة انك مسلمة وفاهمة فى دينك على أكمل وجه ومثال للمسلم اللى يتشرف الاسلام بيه فممكن تفتحى بلوج تناقشى فيه الموضوع دا اهو تفيدى الناس ويمكن ربنا يكرمك وتخلى احد الاخوة المسيحين يسلموا على ايدك واهو تكسبى فيهم ثواب
اما اذا شفتى انك مش المسلمة اللى تقدر تحكم على حد لانك مش على القدر من المعرفة اللى تخليكى تحكمى على حاجة وخصوصا لو كانت علاقة انسان بربه ، يبقى الافضل انك متتكلميش كتير فى حاجة مبتفهميش فيها علشان متبقيش فى نظر الناس زي اللى حافظ ومش فاهم وعمال بيردد اى كلام وخلاص زي البغبغان ودول انا بقول عليهم ناس فاضية قاعدين على المصطبة ومش لاقين حاجة يعملوها فبيتسلوا بسيرة الناس والحكم عليهم وهما ربنا بس اللى يعلم باللى بيعملوه بس فى السر
وزى ما انتى بتضايقى اوى من الناس اللى بتتنصر ففيه برضه ناس كتير اوى بتقرف وبتحتقر المثليات وبتعتبرهم كائنات مقرفة وممكن يقيموا عليهم الحد كمان ، مش كده برضه ؟
فالافضل انك تحترمى الاخر وفكره وعقيدته وشخصيته مهما كانت مختلفة عنك علشان الناس تقدر تقبلك وتحترمك انتى كمان وانتى مختلفة عنهم
sorry again thast it
SOLA
OK NEVER MIND
انا خفت بجد
د/ مصطفى النجار
الف سلامة عليك .. متخافش :)
سمـــــا..
اهنيء الكلمات فيكي..فانت فعلا تلك التي تجيد الرسم بالكلمات..
اكره جدا افلام الرعب واخاف منها..ولكنك..ارغمتني باسلوبك الاكثر من رائع..على المتابعه..
كثيره هي الضمائر التي تعلن الشيطان الاها..وتغرق في عبوديته..وانت رسمتي اجمل لوحه..ممكن ان تعبر عن مثل هؤلاء
مدونه جميله..وقدره فائقه على التعبير..واموت انا بخفه الدم المصري..ضروري يكون لها خانه كده في الادب المعاصر..:))
تحياتي
ربما اخرج العشق اجمل ما فينا
ولو لم يكن حقيقيا لصنعناه فى خيالنا
هو اجمل شئ .. ولأنه محرم .. نمارس فى خيالنا الذى لن يحاسبنا احد عليه
وهكذا ارتدى شيطانه ثوب الملائكة
ويستعد ليبدأ ليلته الدموية
ليلة فيها يمتص الارواح
ليبعث الحياة فى قلبه الميت من جديد
عجبني جدا الجزء ده
واللي بيخدع مش بيجرح قلب او بيكسر انسان هو فعلا بيمتص روحه
تحياتي
انا .. وهى
والله انا متشكرة جدا على مجاملتك الرقيقة وتشريفك للمدونة
وانا سعيدة جدا ان الكلام عجبك رغم انه مجرد محاولات للتعبير عن افكارى اوى احساسى فاكيد شىء يسعدنى انه يعجب الناس وخصوصا لو كانو ذو احساس مرهف زيك
وبخصوص خفة الدم المصرى فانا مضطرة أرفع لك كتفى اليمين زي الافلام الابيض واسود واقولك :
ميرسى على الكومبليموو دا ((:
منورانى وتحياتى ليكى ولحبيبتك
Sheriff
يخرج الحب اجمل ما فينا أو اسوأ ما فينا
الحب سلاح ذو حدين .. الموت فى إحدهما
وعندما ينزلق قناع الخير تصبح الحياة هى الجحيم ذاته
دينا حامد
بقالك زمن مختفية فين ؟؟ اتمنى تكونى بخير
فعلا الخداع امتصاص للروح والمشاعر والادمية مش بس جرح مشاعر
منورانى يا دينا
سما هانم
حشارك البعض مشاعر الخوف بس مش طبعا من الرعب اللى في الابيات ولا حعتبرها فيلم رعب لانى بعتبر الحياة فى ذاتها فيلم رعب احنا عايشينه
بس انا حخاف وارتعب من العشق لاني شيطان العشق انا مش قده فخلينى كدة احسن اتبع نداء محمد منير حد عايز قلب فاضى
ابدعتى فى الابيات وصف وكلمات وتصوير من الاخر جديدة
سعادة الريس
عجبنى اوى انك بتعتبر ان الحياة فيلم رعب كبير عايشينه وانا بضيف انه مش بس رعب لأ دا خيال علمى كمان بس من النوع الرخيص اوووووووووى
يا قمر ميرسى على المجاملة وبرضه هقولك ان الابداع كله فى بلوجك انت وانااكيد مش ناسية اول موضوع قريته فى بلوجك بتاع محطة مصر اللى خلانى احب اتعرف عليك وعلى شخصيتك الجميلة دى
انا مش مختفية ولا حاجة يا قمر انا بكون موجودة اون لاين كتير بس يظهر مواعيدنا هى اللى ملخبطة .. عموما اتمنى اشوفك قريب
سلام يا محمود باشا
سما باشا
طبعا انا اول مالاقيت ان في شياطين استعذت بالله ودخلت برجلي اليمين هههههه
لا بجد ياسما انا مش عارفة انتي بقالك مدة كدة لا بسة النضارة وقاعدة بتبدعي لينا وبصراحة لو الشتا هو اللى عامل فيكي يارب تفضل السنة كلها شتا عشان نشوف كلامك الحلو ده
اما بقى الاغنية فيها تحفة فنية انتي خلتيني انزل البوم وائل كله ولاقيته حلو اوي
قال صحيح ياسمسم برضه مش حتقوليلي البنت نزلت فى انهي محطة بتاعت بوست رحيل ؟؟
طيب البنت التانية مااخدتش اي رقم تليفون ولااي حاجة
اممممم يالا ماعلينا
تحياتي ليكي ياجميل ويارب دايما تبقى كويسة
كلام من القلب باشا
تصدقى انا كنت هنسى اعلق عليكى هنا ولن انسى لكى انك مشورتينى فى تعليقين ابقى فكريتى اعاقبك لما اشوفك :)
لأ انا قلت لك خلاص الاكتئاب انزاح انا هفضل السنة كلها مكتئبة و اللا ايه ؟؟ ايه الناس دددددى ؟؟ دى مش تى ركزى معايا وسلكى ودنك :))
انا هعدى طبعا انك فهمتى البوست لوحدك من غير مساعدة جميع الاصدقاء :))
بس اكتر حاجة بتعجبنى فيكى انك ماشية بمبدأ محدش يسالنى انا هعترف واقول كل حاجة لوحدى
...........................
يا دى القصة اللى كرهتينى فيها دى ... هففففف وانتى فاهمة هفف بتاعتى بيحصل فيها خساير على شاشة الكمبيوتر دايما هههههههههههه
يا ستى قلت ان البطلة شبهى يعنى مينفعش تعاكسيها اساسا رقابتك هتطير قولى انشالله .. والتانية دى واحدة من الخيال اجيبلك امها منين دلوقتى ؟؟
تصدقى انا شكلى همسح البوست دا بسببك !! هفففففففف تااااانى
الكمبيوتر بيدعى عليكى من اللى بيحصله بسببك
:))
منورة يا قمر
Post a Comment